مقتطفات من الكتاب
مقدمةالشعر ....حرية
" آه من الشعر .. هذا الكائن الساحر الخلاب ..منحة الموهبة الجزيلة وامتحان الحياة الصعب الوعر " ..!
بيتهيألي أنا سمعت الكلام ده قبل كده أو قريته لكن امتى وفين ومين وليه ؟ الله أعلم هو أنا يعني عقلي دفتر ؟
انما والشهادة لله الكلام ده كلام واحد عاشق خد رمش عين رشق في صميم قلبه جاب رجليه فوق ورأسه زرع بصل كما حدث للعبد الفقير المطيور كاتب هذه السطور .
أول الزمانات قابلته ملكا متوجا على عرش من الأنغام السحرية شايلاها مجموعة من الحناجر الذهبية زي أم كلثوم وعبد الوهاب وزكريا أحمد والسنباطي وفتحيه أحمد وأستاذ الأساتذة الشيخ علي محمود معجزة الأداء العظمى في العصر الحديث . وأيضا قابلته مستخبي في المواويل الحمرا والخضرا اللي قالها الفلاح المصري الفصيح في شكوى الزمان والمكان .
وزي ما بيقولوا العشاق وقعت في شباكه من أول نظره ومن يومها وهو مشحتفني وجرجرني وراه في المحاكم والسجون لحد ما حفيت رجليا وتعبت أحلى تعب وأنا برضه ماشي وراه ..بلاد الله خلق الله مطرح ما ترسي بادق لها والمخوزق يشتم السلطان واللي يعرف أبويا يروح يقول له واللي بيجيب لي العشا يحوشه وقدرت أقول كلمتي بالصوت العالي ورزقي ع اللي رازق الدوده في بطن الحجر لأن الشعر رباني وعلمني لا أبلع لساني ولا أجز على لأسناني ولا أدهن الكلام ألوان ولا أقول للقرد .. يا قمر الزمان .
بتغني للحب والزرع والحصاد والعالم كله بيسمع ويقول : كمان يا ست كمان !!
معنى الكلام ان القصايد الموجودة في هذا الديوان تقدر سيادتكم تسميها الشعر الحر وأنت مستريح البال والضمير لأن الشعر حرية ! وكل واحد يسمي شعره على هواه واذا كان الساده اساطين النقد الأدبي رأيهم أن الشعر الحر هو اللي بلا قافيه ولا شكل فهم أحرار لكن أنا رأيي ان الشعر الحر هو اللي بيطلع من القلب عدل أو يوصل للقلب عدل والمسألة في رأيي لا تخرج عن كونها خلاف في وجهات النظر وأهلا بأي خلاف في وجهات النظر على شرط انه يكون خالص لوجه الوطن لا تشوبه شائبة لا بقعة نفط من جزيرة العرب ولا شبة نفاق لحاكم مستبد راكز على قلب شعبه بالحديد والنار والتليفزيون !
في عشق مصر المحروسة حبة عين العرب ونبض قلبهم الحي – كتبت هذه القصايد وفي عشق مصر حضنت كل القصايد وقدمتها للناس وكان الثمن مزيد من العشق والجنون وصدق اللي قال الجانيين في نعيم والشعر حرية .
أحمد فؤاد نجم
القاهرة مارس 2005
بيانات الكتاب
تأليف : أحمد فؤاد نجم
الناشر : دار الأحمدي للنشر
عدد الصفحات : 626 صفحة
الحجم : 6 ميجا بايت
تحميل كتاب الأعمال الشعرية الكاملة أحمد فؤاد نجم
ليست هناك تعليقات:
إرسال تعليق