كتب كتب كتب: محمد ابراهيم

‏إظهار الرسائل ذات التسميات محمد ابراهيم. إظهار كافة الرسائل

الخميس، 18 ديسمبر 2014

فلوماستر ابيض لـ محمد ابراهيم

ديوان بالعامية المصرية للشاعر محمد إبراهيم

مقدمة

أنا سبتني فـ وسط الطريق علشان جبان ..
ايدي اللي دابت دق على كل اليبان ..
الرعشة فيها و خطها عـ السطر مال ..
قاعد بضفر شعر واحدة ماشوفتهاش
و أبني فـ آمال ..
فلوماستر أبيض

و أكتب قصايد من وجع ..
و أرميها في درج المحال ..
ما انا أصلي عمري ماكنت بحلم ابقى حاجة
زي ما كانوا العيال ..
أنا حتى عمري ما كنت بلعب كورة فـ الشارع معاهم ..
ولا عمري حتى لعبت بلي ..
و لا كان لي جرأة أنط سور المدرسة و أجري ..
الاسم أهو شوية حروف ..
السن مش فاكر قوي ..
الحالة راضي بحالي و بقدري ..
طيب ساعات .. لكن !!
ساعات شرير قوي
أنا مش لاقيلي أي وصف ..
و مش عارفلي أي حال ..
حبيت كتير .. و عرفت بنت و غيرها ..
و اتحبيت ساعات
يمكن زمان انا كنت لخمة ..
بس ناو ..
مابقيتش خيبة مع البنات ..

الضلمة ليها جزء فيا ..
و ليا فيها كلام كتير ..
و أعشق عتاب النفس فـ المرايات ..
و أعشق كمان " أنغام قوي
تقدر تقول الـ Memory card بتاعتي صوتها
بيجري فيه ..
و الباقي ...
عادي مش مهم
و بحب فيروز " من زمان ..
صوتها اساسا فيه مسكن للألم ..
أما " نزار
فده قصة تانية كبيرة بعدين تتحكي ..
كل حرف ما بين حروفي هتشوفوه ..
و أحب اقول ..
ضيعت وقت كتير قوي فـ مسلسلات كرتون زمان ..
و أحب اشكر قدوتي ( سنفور كسول ) ..
ما انا اصلي حد ممكن تعرفوه
و أخص بالذكر الصديق ( مايكل )
يعني اللي مستحملني مهما عملت فيه ..
و شريط ( تملي معاك ) عشان ..
أول شريط كنت اشتريه ..
ما انساش كمان ..

البيت بتاعنا فـ البلد و أيام زمان ..
و الفيفا أول ما ابتديت .. إني اميز
شكل الزراير فـ الدراع ..
و عمنا احمد نجم و قصيدة البتاع ..
في كلام كتير ..
قصتنا لسه مكملة جوا الديوان ..
فإستنوا يمكن تعرفوا !